Sunuq Qélich

Aptori: Abduréhim Abdulla


Astimda shaqirap derya aqidu ,
Éship barmaqtimen bir tik dawandin .
Aldimda bir sunuq qélich yatidu ,
Bilmeymen yadikar qaysi zamandin .

Qélichning yérimi tupraq astida ,
Yérimi almastek turidu chaqnap .
Bu qedim jenglerning yaldamisini ,
Hayajan ilkide aldim awaylap .

Titridi qollirim tunidi yürek ,
Hilal ay egmisidek egri qélichni .
Zatimning hidliri keldi güpildep,
Bilmidim qayhalda nepes élishni .

Qélichning biside quyash jilwisi ,
Balqiydu iptixar balqiydu zer nur.
Jaranglap sun'ghachqa jengde armansiz ,
Süzük sunighida külidu ghurur .

Tawlan'ghan bou qélch igilmes bolup ,
Jesurlar wetinining ochaqlirida .
Qesem süyi ichken chiqip ochaqtin ,
Ahu köz medetkar bulaqlirida .

Keltürgen qélichni bu tik dawan'gha ,
Wetenning söygüsi jenglerge chillap .
Sun'ghan chéghidimu rishti üzülmey ,
Teberruk tupraqni aptu quchaqlap .

Oylidum shundaqmu qélichlar barken ,
Bir qétim qénidin chiqalmaydighan .
Bassa yaw weten'ge paskina ayagh,
Qisas qehri bilen chaqnimaydighan .

Xiyalchan tikildim sunuq qélichqa ,
Eynektek tighidin körondi jenggah .
Bu qélich shir süpet bir er qolida ,
Düshmen'ge weylundin bermekte agah .

Chiqidu shiwirghan oq üzse sadaq ,
Umud ning zerbide qalqan qaltirar.
Tekkende gezlershken herbir qélichqa ,
Bu qélich bisidin chaqnap yaltirar.

Ah... Qandaq sundi u qélich ?,
Jenggahni lerzige saldi shu sada .
Taghlardin taghlargha uruldi eksi ,
Her taghda bir qélich sun'ghandek goya .

Quyashmu qaraydu sun'ghanda qélich ,
Zeperning yüzige tartildi niqab .
Batur at üstidin ghulidi bashsiz ,
Kishnidi dulduli zarliq chiqirap.

Qéni u bahadir, qaridim kökke,
Qéni u qilichqa munasip er dep.
Quyashtin, nurlardin izlidim uni .
Uningdek oghlanini yutmaydu yer dep.


Pendiyat! qiyagha ayliniptu u ,
Qilichning destisi qaptu ilkide.
Tentene qilidu erlik ghururi,
Mermerdek yaltirap turghan yéride.


Shehidning boynidin tamchighan qanlar,
Deryagha yaquttek chüsher tamchilap.
Oxchidi yüzümge deryaning süyi,
Bildimki u méni aldi quchaqlap.