Uyghurname

- Derwish



"U"lughluqtin bashlan'ghan nepes
esrlerning chapqunlirida
singip kétip teklimakan'gha
éghir - éghir éptimish nepes .
kök börining küküsh yaylidin
uchup chiqqan uyghur teqdiri .
unda ne qilsun altun qepez .
mana bu qismet , oghuzxan !
tiriwalghin qarchuqliringni ,
menggülük sanga ebediy mensup .
karwan yolida hushqiytar boran .

"Y"ashash üchün tuzamdu yashliq ,
yashliq üchün yashamdu dunya ?
yashliq téxi qedimiy yolda .
tögiler izida ghijek awazi .
idiqut , qeshqer , balasaghun ...
tögining qosh lokkisi uyghur makani ,
ene boghda , ene xantengri .
uyghur qizi tal - tal örüm chach
bostanlargha bergen méhrini .
qaparghan qollarda üzüm yapriqi .
bext kömülgen tayanshan .

"GH"eyurluqning gül tajisidek
abidige pütülgen uyghur .
méhraplargha söygü yéziqliq ,
sejdilerge chikilgen dunya .
karizlarda uyghur simasi ,
sap imanda yipeksiman wada .
kirpiklerge hayat ésilsa ,
tosup bolmas meyxorni meydin .
ünlep chiqqay aq kepter jamdin .
(qanat yayghay zengger samada .)
her bir jamning xisliti bashqa ,
her ötengde uyghur moqami ,
zeytun shéxi tashlan'ghan jayda .

"U"lugh éghish - axirqi purset ,
yéqin qaldi rehimsiz purqet .
yashash bilen ölüm ariliqi
yapraqlarda silkinish peqet .
chiraylarda nigah qatmisi ,
azabning bergige ésilmas munchaq .
muqeddes söygüge muqeddes pakt -
taghlargha ezeldin bolup muekkel
magma atqan yanartaghsiman .
térep turghin chuqqiliringni ,
séni hergiz basmisun musibet .

"R"oh senimi kötergen changlar
qoniwaldi dümchek xiyalgha .
yüdüp uni yéqilip - qopup
barghin , uyghur , barghin yéraqqa .
rawabingning mungluq küyide
irip - irip aqqanda özüng ,
dutaringning dolqunlirida
ötmüshüngge uchqanda közüng
séghiniwal ! sanga bu meqbul .
nawai - bir köchmes yultuz ,
uyghur , sanga öchmes nur bergen .
kiriwalghin pütüklirige .
titrigen qolungda bext parchisi ,
baghliwal uninggha barche yörekni .

UYGHUR, lewliringde tönigen chüshüng
barmaqliringni özige tartmaqta .